ING TENGAHE RAMADHAN, GEGURITANIPUN MADAGUMILANG

ING TENGAHE RAMADHAN
geguritanipun Madagumilang

isih kuwat ngempet syahwat
isih saguh adoh lawuh
isih gelem kirang tilem
isih traweh ora waleh
isih tadarus durung putus
isih tansah suka ngenteni buka

ya isih kaningaya ngoyak riyaya

Ponorogo, 16 Ramadhan 1434H

ESEM MUNG SAK KLECEM geguritan Anggitanipun Madagumilang

ESEM MUNG SAKLECEM

~ geguritanipun MADAGUMILANG

ing antarane pilar-pilar iku,
ana saperangane atiku kedudut tatu,
mung kerana kena grayang panyawangmu,
ah, esem kang mung saklecem,
kaya-kaya wus kuwawa muwuhi dayaku tansah nyangga jejege pilar-pilarMu

Ponorogo, 22 Mei 2013

Obor 2013 geguritan anggitanipun Madagumilang

Obor 2013

Geguritan dening Madagumilang

Kobongé ati kang beluké lan awuné nyesek-nyesek ambegan iki, ngebaki ciuté cepitan bolongan irung nganti kentèkan segeré hawa. Kuwi sadurungé rasa kebrongot nglalèkaké geniné kang  sregep ngobong sakèhing cubluk, amerga gelem digawé kèsèt déning rasa ngresula dawa. Yagéné ora duwé pangangkah dhéwé kanggo mbeciki dina sésuk?

Ponorogo, 4 Januari 2013

 

 

Dumadine Pitakonan Geguritane Madagumilang

Dumadine Pitakonan

 Geguritane Madagumilang

 Yen dumadine dudu daden-daden. Wektune ya dudu dumadakan. Apa dumadine, dipun du?

Yen pitakonan kaya ngene teruse kok punggel
Dikaya ngapa aja mbundel
Aja diguyu kekel lan apamaneh digawe pegel mangkel
Wong gagasane wis kendel

Ponorogo, 26/08/2012

 

Makarya geguritan anggitanipun Madagumilang

Makarya

Geguritanipun Madagumilang

yagene mung sedhakep ngekep dhadha
jare yen ora ubet ora bakal isa ngliwet
kejaba sliramu nembe tegel ngguwak kalodhangan saengga ora kumanan
rejeki kang tumiba ing saurute dalan penguripan
ora tangeh tansah dadi rebutan
mula bener, yen ora obah sengara bisa mamah
senadyan kekarepane ati golek gampange
kaya mung pengin wira-wiri wareg lan bola-bali bathi

Ponorogo, Juli 2012

Dudu Sesorah Anggitanipun Madagumilang

Dudu Sesorah

 Geguritanipun Madagumilang

Makaping-kaping dadi pepeling dumelinge sesambat adhuh kuwi

Tumetesing rasa trenyuh kang kaya mletik saka pinggiring akik

Sesotyaning ngibadah diembani iman endahing dedonga wanci wengi

Cabar kapenggak dening lungiting laku sabar

Anggone meper mothahing nepsu lan pepenginan nurut lakuning jaman

Ana patrap umuk mbaka umuk durung keconggah nelukake wujude sujud

Pasrah tanpa sesorah menawa urip mung mampir ngombe

Nanging ya kudu pener milih apa kang kudu diombe

 

Ponorogo, 2012

Nyebar Konang geguritan dening Madagumilang

Nyebar Konang

Geguritan anggitanipun Madagumilang

dipadhangana wong sewengi peteng ndhedhet pindhane ati kang ruwet
ora bakal nyethakke le gojag-gajeg nggegrayang liding pangandikan
parandene ora kesawang kang nlesep-nlesep jeroning pitutur iku
senadyan sakecap mbaka sakecap cemlorot cahyane nyunari jiwa

Ponorogo, 2011

Ikuti

Get every new post delivered to your Inbox.

Bergabunglah dengan 362 pengikut lainnya.