MADAGUMILANG

Ngangseg Geguritan Anggitanipun Madagumilang

madagumilang — Thu, 26 Jan 2012 01:58:16 +0000

Ngangseg

Geguritan dening Madagumilang

tletik udan mau bengi wani menehi wisik

kang ndelik bisik-bisik selaning pasuketan pating krelip kaya lintang

nanging nalika sorot srengenge cemlorot madhangi ubale nepsu

tumekane bakal ngruntuhake embun kang sumimpen jero

senadyan rasa adhem iki isih agemanmu kang tak anti-anti

tumekaning sreg anggone ngangseg

ngrangkul ngruket ora-ora yen aku mingket

Ponorogo, Januari 2012

madagumilang — Wed, 11 Jan 2012 11:58:10 +0000

Nggugah

geguritan anggitanipun Madagumilang

wonten ing salebeting swasana bubrah

kerana kathah tumindak cengkah

ingkang katindakaken para panguwaos ingkang mboten amanah,

kedahipun inggih enggal saged owah

garising nasib rakyat ingkang sampun rumaos mboten betah,

mboten sranta anggenipun kepengin nemahi gesang limrah,

inggih gesang ingkang para panguwaosipun sami gumregah

nyengkuyung pikajengipun rakyat ingkang atansah mothah nyekapi betah

Ponorogo, Januari 2012

madagumilang — Tue, 27 Dec 2011 23:43:09 +0000

Kaya Tanpa Gagrak

Anggitanipun Madagumilang

pancene rada dumakan, mrucut uwal saka gubele pedhut

kang mblasah sagotrah nalika kabeh ancas lan upadine kaya tanpa gagrak

wis cukup diparingi udan sewengi lan trontong-trontonge

banjur njebul ajeg tan mateni sakehing krenteg nggone nyuwun pepadhang

Ponorogo, 23 Desember 2011