Makarya geguritan anggitanipun Madagumilang

Makarya

Geguritanipun Madagumilang

yagene mung sedhakep ngekep dhadha
jare yen ora ubet ora bakal isa ngliwet
kejaba sliramu nembe tegel ngguwak kalodhangan saengga ora kumanan
rejeki kang tumiba ing saurute dalan penguripan
ora tangeh tansah dadi rebutan
mula bener, yen ora obah sengara bisa mamah
senadyan kekarepane ati golek gampange
kaya mung pengin wira-wiri wareg lan bola-bali bathi

Ponorogo, Juli 2012

Iklan

Tumrap Ada-ada Kudu Manut geguritan anggitanipun Madagumilang

Tumrap Ada-ada Kudu Manut

 Geguritan dening Madagumilang

 Geleme nglakoni kuwi merga isih sregep apa wegah lumuh?

Yen lumuh ya lumuh nyapa dene sregep ya sregep nyapa

Wong upamoa sregep harak sregep-sregepku dhewe

Tur ya lumuh-lumuhku dhewe

Ngene iki apa ateges njebol bendungan wewaler

Lha wewaler sing endi?

Mesthine sing ra nyocoki ati

Sing kaya pasa uwis dak sahurke

Aku kebanjur tansah mbeguru maring kekarepanku

 Ponorogo, Juli 2012

 

Apa Mbok Kira geguritan dening madagumilang

Apa Mbok Kira

 Geguritan Dening Madagumilang

 apa mbok kira yèn wis kuwawa kuwasa kuwi banjur sak kepénaké

nganti ora rumangsa ditekani rasa wegah olèhe sregep ngopèni roh

kang dianggo nggegulang jiwa dimèn nora pèndèng kejepit jantraning wektu

tansah munyer ngisèni urip lan penguripan

nora mung mbegegeg nyeksèni lelakon mbaka lelakoné para kawula alit

kang panjerité keprungu sora ing sangarepé

nanging arepa dikaya ngapa,

ngenggoni jejeré wong sudra aku mung bisa ngudarasa

Ponorogo, 15 Juli 2012

Ada Dalam Doa Dalam-dalam Puisi Oleh Madagumilang

Ada Dalam Doa Dalam-dalam

Oleh Madagumilang

Berada di keberadaan ada

Aku mengakui  keakuanku

Dikemanakan ke mana

Sebisa-bisanya bisa

Adalah menyerah

Allah

Ponorogo, 19 Juni 2012

Sanggarunggi geguritan anggitanipun Madagumilang

Sanggarunggi

 

Dening Madagumilang

 

yen kelakon aku iki kok sengguh ebun kang pungkasan

tumetes saka satengahing pedhut reruweting kahanan

banjur gawe adheming ati kerana lejar

bisa mapag srengenge nyunar ing wanci pajar

yagene pepeteng kuwi isih kekembeng ing netraning katresnan?

 

Ponorogo, 8 Juni 2012

Mulat Sarira geguritan anggitanipun Madagumilang

Mulat Sarira

Geguritan dening Madagumilang

wus dak lakoni mandeng kanthi jinggleng
kang katon durung mesthi maton nanging nganggo wewaton
dipaido dianggep bodho kayane pancen ya mung semono
yagene kudu selegenje, aku mung salah sawijining menungsa
kang saderma ngupaya paraga pangruwating papacintraka ana Ponorogo

Ponorogo, 28/05/2012

Dudu Sesorah Anggitanipun Madagumilang

Dudu Sesorah

 Geguritanipun Madagumilang

Makaping-kaping dadi pepeling dumelinge sesambat adhuh kuwi

Tumetesing rasa trenyuh kang kaya mletik saka pinggiring akik

Sesotyaning ngibadah diembani iman endahing dedonga wanci wengi

Cabar kapenggak dening lungiting laku sabar

Anggone meper mothahing nepsu lan pepenginan nurut lakuning jaman

Ana patrap umuk mbaka umuk durung keconggah nelukake wujude sujud

Pasrah tanpa sesorah menawa urip mung mampir ngombe

Nanging ya kudu pener milih apa kang kudu diombe

 

Ponorogo, 2012